電腦佮手機仔 Line 的圖案金金反光，有兩條猶未讀。咧欲規禮拜矣，按算就按呢共放咧，無想欲讀矣。
金金反光的圖案，若袂輸啥物記號咧。我雄雄想著「床母做記號」這句話。我的正手後曲內底面，自細漢時陣就有一塊圖案，大腿嘛有。有一塊敢若親像「注音符號」的「ㄠ」。拄才想欲共斟酌看，才發覺著已經差不多欲看無矣。
床母的記號我心內底猶會記得。有誠濟代誌嘛攏猶會記得，只是可能外表已經看袂著矣。
看袂著嘛好。較清幽。以前厝內底的序大人定定會講這句，「較清幽」。
序大人猶愛講一句，「曷就拄著矣，無欲按怎」。我自細漢就有夠 tsheh 的一句話，無想著 tsit-má 煞翻頭轉來變成我咧安搭序大人的話。
其實我心肝頭想著的，是 upekkhā。只是這字欲按怎解釋予序大人聽，有較難。
彼兩條，可能就囥咧，繼續予伊咧猶未讀就好。