欲大學聯考彼年，逐工跍佇牯嶺街地下室的『K 書中心』，有的同學足認真拍拚咧讀冊，我實在無法度，嘛無才調。有開錢稅一位，下課冊揹仔揹咧 to̍h 過來坐，敢若定定嘛猶未放學 to̍h 來遮覕。
佇外面的巷仔口食薰，若有熟似的朋友來就開講，無就家己 phak 佇桌仔頂欲睏若毋睏咧。
有時揣一寡小說反反看看，大部分的時間耳仔訪（hīⁿ-á-hóng）窒入去耳空內，全世界啥物代誌攏 kā lín-pē bô-tī-tāi，啥物代誌攏無想欲 chhap-siâu。
『K 書中心』m̄-nā 有位通稅，猶有冊櫥仔一格一格，稅一個月毋知偌濟錢我嘛袂記得矣。
我佮一个好朋友公家稅一格。
別人的冊櫥仔內底攏是聯考欲考的課本、參考書，goán-ê 彼格內底，全是一塊一塊的錄音帶，彼當時上愛聽攏是 80 年代的『糜糜之音』，一日無聽 to̍h 規身軀 lám-lám 無氣力。有一塊歌咧唱講 “her life was saved by rock ‘n’ roll”，差不多 tio̍h-sī 這款日子。
內底有一塊我印象上深的錄音帶是人咧叫 Boss 的 Springsteen ê The River（其實應該是兩塊），我猶會記得彼陣不時會想講，按呢逐工聽，逐工操，錄音帶是毋是誠緊就歹去。佳哉至少到聯考進前攏猶會聽得。
二三十年過去矣。彼个好朋友，蔡偉鼎，佇大學教冊（人早 to̍h 已經是德國哲學專家矣），這學期佇政大有一門課欲讀 Gadamar ê The Enigma of Health，討論健康的觀念，我拜四早起欲去鬥熱鬧開講，講一寡這幾年咧學咧練的代誌。