by Rev. W. Campbell, 1913

Thâu-sū

In-ui chit ê jī-tián ū chha-put-to chit-bān gō·-chheng koh-iūⁿ ê Hàn-bûn jī, múi jī ê kóe-seh put-tek-í tio̍h khah kán-sía, m̄-kú i ê ì-kiàn sī kàu gia̍h bēng hō· lâng chai kok jī thang chòe sím-mı̍h tú-hó ê lō·-ēng.

Chia ê pe̍h-ōe jī sī thàn lán Sèng-keng ê jī-hoat, chiū-sī iōng ch jī kap ts jī lâi hun-pia̍t nn̄g khoán ê kháu-im; ch tī e kap i jī ê thâu-chêng, ts tī a, ng, o, o·, kap u jī ê thâu-chêng, chhin-chhiūⁿ; CHE, cheh, chek, cheng; chi, chia, chiah, chiam, chian, chiang, chiap, chiat, chiau, chiauh, chih, chim, chin, chio, chioh, chiok, chiong, chip, chit, chiu: TSA, tsah, tsai, tsak, tsam, tsan, tsang, tsap, tsat, tsau, tsauh; tsng; tso, tso·, tsoah, tsoan, tsoat, tsoe, tsoeh, tsong; tsu, tsuh, tsui, tsun, tsut.

Pún jī-tián iā sī thàn Séng-keng thó·-im ê iūⁿ, in-ūi Chiang-Tsoân-Tâi, sui-jiân ū chōe-chōe khiuⁿ, lán beh in chheh, tsū-jiân tio̍h tè hit-hō khah thong-hêng ê thó·-im, sòa hō· lâng tha̍k ê sî-chūn chhut-chāi i lâi ho·. Au-lo-pa chiu ê kok kap Tāi bi-kok ê lâng sī chiàu án-ni lâi kiâⁿ.

Góa sì-cha̍p gōa nî chêng, kàu Tâi-oân ê sî, lóng bô chit-hō ê jī-tián, iā lóng bô chai-iáⁿ ê sian-siⁿ tī-teh; só·-í goá kín lâi chhut-la̍t, tōa ǹg-bāng che jī-tián ōe pang-chō· chōe-chōe lâng bat jī chiah khah ōe hiáu chīn pún-hún.

In-ūi Tâi-lâm kàu-hōe sio̍k ê ha̍k-seng Lîm Kim-seng í-kı̍p Tân Tōa-lô kap góa tàu chòe chit ê kang-tiâⁿ, lán tio̍h kā in seh to-siā.

Kam Ûi-Lîm