February 2022 – dessassossego

茈葉

這幾工直直咧看相戰的新聞，看人的國家、人的國民勇敢抵抗。想著家己身軀邊有一寡自細漢就熟似的朋友，到時若戰到台灣，無的確就誠實愛佮怹相戰矣。

想著心肝頭真正會酸。

落雨幾偌工，昨佮今仔日日頭大出。昨專工去 Si̍t-bu̍t-hn̂g 看樹仔，今仔日食暗飽，猶有日頭，攑頭看樹仔頂新 puh 出來的 tsínn-hio̍h（茈葉），光線照落，又閣古錐，心情敢若嘛袂輸 hőng 安慰著。

這站仔較捷早起出去散步。行巷仔尾的駁岸邊。一輾差不多四五公里，沓沓仔行，大概四五十分鐘。沿路白頭鵠仔、烏鶖，佮留佇這搭位過冬的燕仔四界飛。娘仔樹開始咧結籽，樟樹、a-bu-kha-lo 一欉一欉花開甲滿滿是。遠遠看看大屯、七星山頂罩雲罩霧，有時天氣、運氣較好，猶看會著南爿雪山山尾頂猶未溶去的白白的雪。春天來矣。雙跤行出來，目睭thí予金，斟酌聽，嘛會使鼻看覓。毋是別人按怎講，是家己規身軀體會著的。春天來矣。