風颱欲來若毋來的歇睏日，早起先駛去草山凊彩踅踅咧，佇大路邊看竹仔山山尾頂的雲佮日頭光咧走相 jiok，坐佇焦甲見底的鴨池邊仔，看風一陣一陣 kā 七星山的菅芒吹甲那咧跳舞，規腹內的齷齪甲欲死的氣有小可消透淡薄仔。
熱甲強欲袂喘氣，毋敢閣加行路，駛過去石門阿里荖遮來坐咖啡廳。熱甲欲死的時，有冷氣才有精神通看著海的色水嘛媠甲欲死。
咖啡啉了，開始讀冊，那讀那揣手機仔內底的字典，新學著的字加寫兩改，冊面頂的ふりがな實在看袂明，目鏡一時仔著愛掛咧、一時仔閣著囥落來，無張持煞眼著窗仔門外口一樓大埕有一个褪腹裼的阿伯仔，捒一台孤輪的貓車（ねこくるま），行一兩步就險仔徛袂 chāi、險仔欲昏倒的款。日頭真正赤炎炎，我那看那驚阿伯仔毋知會出代誌無。
我咧想是毋是欲叫咖啡店的員工去看覓。一目 nih，阿伯仔煞無看人去。我規氣就家己傱落去。
阿伯仔無去矣。
阿里荖這間咖啡店是舊的國校仔改的，家己一棟，邊仔一間厝嘛無，干焦賰一間可能是炭窯的倉庫，我看來看去，一个人嘛無。無敢誠實光頭白日去予我拄著魔神仔。
閣出來斟酌看，才注意著邊仔看起來無人整理過的山路內底，敢若有人影。行入去幾步，看著阿伯仔坐佇內底較遠的田岸邊，袂輸咧佮人開講。
按呢應該是無代誌矣，可能阿伯仔厝裡的人抑是朋友。
我猶是小可僥疑，猶是加行幾步，出聲佮問，「阿伯仔，拄才有跋倒無，有代誌無」。阿伯仔越頭看著我，笑面笑面應我講無代誌。我才確定講伊是家己一个人咧講話。
今馬變做伊開始咧佮我開講。講伊蹛下跤一間白鐵仔搭的厝，講怹查某囝佇石門，中晝𤆬伊去納第四台的數，講伊進前有一改跋倒足嚴重，去台大病院蹛院幾若禮拜，拄才毋才會跤頭趺無力。
伊泉腔誠重的台語，十句差不多有一兩句我聽袂明。我想欲 kā 問予清楚，伊猶是家己講家己欲講的。煞落來，叫我綴伊行入去較內底，伊欲掘番薯予我。我 kā 說多謝，講毋免啦。伊無欲插我，講伊種偌濟拄偌濟，紅皮紅肉的，攏無下農藥。
我那聽那綴伊行，入去內底，真正彼片番薯。伊鋤頭夯咧，開始那掘那咧講，「我以前偌 gâu 賺錢咧，龍巖來買地進前，我一工去佗位佗位攏嘛賺幾若千箍」，「猶未跋倒進前，我四界去 kăng 割草，我足 gâu 割草 lio̍h」，「我以前佇乾華國校遐」，「我 kā 你講，我已經做阿祖矣 lio̍h」。
「阿伯仔，你今年幾歲」，伊應講伊老爸九十外才過身，伊家己是四十年次的，今馬七十三矣。番薯一藤一藤掘起來，我去鬥抾，伊講後壁猶有種芋仔，嘛會使予我一寡。我直直 kā 擋，「毋通啦，阿伯仔，我提袂贏，嘛食無遐濟啦」。
風颱前的下晡時，日頭猶誠炎。阿伯仔鋤頭小擲佇邊仔，坐落來歇喘一下。橐袋仔撏一包薰欲食，嘛欲請我食。我講我無食。伊薰點咧，「我號做阿正啦」，我隨應講，「愛叫你阿正伯仔 ho͘h」伊規个面笑甲，「heⁿ-lah，進前彼國校仔郭主任嘛是攏叫我阿正伯仔」，「頭家，你誠實無欲食薰 sioh，我這西德的薰 lio̍h，一包百二，一工食兩包。麥仔酒大罐的，檳榔擔捾的，一罐四十五，若佇賣臭豆腐彼間雜貨仔店買，一罐四十二，檳榔擔的較貴，彼 seⁿ-sêng–ê，愛hŏng 趁淡溥仔啦」。
路尾阿正伯仔對ねこくるま反一 kha 塑膠袋仔出來，內底貯伊彼罐大罐麥仔酒，我叫是伊今馬欲啉矣，結果是用這 kha 袋仔予我貯番薯，一袋滇滇滇，tâng-hoâiⁿ-hoâiⁿ。
「我阿正啦，頭家你若有閣來，愛來揣我喔，我蹛下跤遐白鐵仔搭的厝啦。無，後逝你若來，我才𤆬你去挽阮某種的菜瓜，有夠甜，嘛攏無農藥的喔。」
這一陣仔見拄攏拄著一寡烏魯木齊的代誌，懊鬱甲欲死。毋過聽阿正伯仔講半點鐘久的話，慒悶敢若暫時攏消散去矣。
欲睏進前我小整理一大袋的番薯，用較細 kâi 的橐仔分分五六袋，聽候過兩工蝕水了後分予朋友。
干焦按呢整理整理咧，雙手沐著的番薯 leng 用酒精洗予清氣，差不多十外分鐘久，規个人又閣感覺輕輕鬆鬆，袂輸食著番薯的甜，看著阿正伯仔的笑面，我嘛心花開甲。