春天來矣

這站仔較捷早起出去散步。行巷仔尾的駁岸邊。一輾差不多四五公里，沓沓仔行，大概四五十分鐘。沿路白頭鵠仔、烏鶖，佮留佇這搭位過冬的燕仔四界飛。娘仔樹開始咧結籽，樟樹、a-bu-kha-lo 一欉一欉花開甲滿滿是。遠遠看看大屯、七星山頂罩雲罩霧，有時天氣、運氣較好，猶看會著南爿雪山山尾頂猶未溶去的白白的雪。 春天來矣。雙跤行出來，目睭thí予金，斟酌聽，嘛會使鼻看覓。毋是別人按怎講，是家己規身軀體會著的。春天來矣。