這站仔差不多逐工攏有咧練走。有時是專心咧走，共走標當做是坐禪，盡量啥物代誌攏莫亂想。今仔日是放予伊家己去 gô，gô leh gô leh，敢若袂輸就知影電腦開 loeh 去欲創啥。感覺若咧 thāu 毒咧，先走標三十分鐘，煞落來自然就有題目通寫。
秋分過了後，可能是沓沓仔咧變天，定定攏是透早天拄拍殕仔光就精神，了後閣按怎反來反去，總是僫睏，若有閣睏去，嘛是直直咧眠夢。今仔日透早就是按呢。
我夢見佇某乜人的厝裡，伊共我講（用北京話），『不行啦，你再這樣，我會受不了了』。袂輸是二三十年前的記持。記持當然嘛是騙人的，毋過夢內底的畫面誠清，看足明–ê。雄雄叫是若誠實發生過的代誌。
早起我寫面冊寫一條，「對我來講，網路的世界若有 those good old days 這款代誌，可能 to̍h-sī 彼陣逐家人咧寫家己的 blog，逐家人用 rss 四界去巡田水。」我寫的時當然嘛有想著已經過身的朋友，佇彼的網站，我的第一个 blog。
我猶想著另外一个朋友，伊彼陣佇 BBS 站的名號做春天，用法文寫的。另外一个朋友，嘛是對 blog 牽著的，逐家猶毋捌，相招約出來見面，這个朋友特別解說講伊毋是查某的喔，叫 gún 幾个莫誤會。奇怪，伊袂輸已經知影 gún 幾个攏是查埔的。
nā 走汗 nā 滴，頭殼內底繼續咧 gô，gô-lâi-gô-khì 攏是超過二十年以上的記持。記持當然嘛是後來家己編出來騙人、騙家己的。
前兩禮拜有一暗欲睏進前，我雄雄想欲看一个畫面。Ka-la̍h-á 的舊公寓厝。我自小學一年搬到這間彼當時的新厝，一直蹛到三十歲結婚才搬離開。我用手機仔的 Google Earth 揣，猶看會著 goán 媽媽煮食的灶跤，囡仔時我放學轉來會佇對面樓跤巷仔口看著伊，有時我嘛會刁工踅對邊仔去，予伊看袂著我。手機仔 lu 對另外一爿，看著披衫的陽台，陽台內底的房間，一直到國中，我猶無家己的房間，猶佮 goán 阿兄擠佇仝一間房間，敢若有一段時間是睏雙層的眠床，到我讀高中的時，厝裡重新格間，我才有一間細細間仔家己的房間。
厝猶佇咧，毋過舊年已經賣矣。有誠濟冊我嘛無想欲閣搬走，無想欲閣看矣。有一套十三經，有袂少有的無的亂七八糟出版社送的冊，有轉大人進前咧看的「尪仔冊」。路尾應該攏予來拚掃的人擲擲掉去。
這兩年、這站仔不時就有毋知影對佗位 pû 出來的畫面，若咧陷眠，閣若親像是記持內底無細膩去反出來的寶貝抑是糞帚。反正就是直直咧 gô-lâi-gô-khì。
我繼續走，汗繼續滴。不只是畫面，連聲音 tō 出來矣：「腦海中的走馬燈，留戀啥路用。」