這禮拜看兩逝影片。拜二去看 Palestine 導演 Elia Suleiman 拍的 It must be heaven，內底有兩幕戲我看了上佮意，一幕是拄開始無偌久，導演厝邊的一个老大人家己一仙毋知頭佇來、毋知尾佇去，一出場就開始講伊去拍獵（phah-la̍h）、大尾錦蛇報恩的故事，另外一幕是尾仔欲結束進前，一个穿金龜綠（kim-ku-li̍k）色水有夠奅（phānn）的查埔人孤一人跳舞，跤尾躡懸懸，跳甲真迷人。
今仔日下晡去台北美術館看 Apichatpong Weerasethakul 的展覽 The Serenity of Madness。三片較佮意、較有印象，一支是 Fireworks (Archives)，背景佮怹泰國六十年代的「白色恐怖」歷史有牽連，毋過我看著的重點是敢若「政治版」的「秋茂園」的趣味形影。
第二支是有飼貓仔的朋友可能攏會有興趣的 Fiction，影片內底的人提一支萬年筆佇寫字，不時就有蠓蟲、 ia̍h-á 飛來簿仔紙頂面，鏡頭不時徙去日光燈管（Apichatpong 真愛翕日光燈管），雄雄一隻貓仔一跤踏起哩簿仔紙頂面，到尾仔閣規仙攏 peh 起來頂頭，我是感覺足有 Kafka 的影跡（XD）。
第三支 Phantoms of Nabua，這片內底有另外一片 Nabua 佇背景放送，背景猶有一支電火柱仔，柱仔頂一支日光燈管（又閣是日光燈管），配後壁茄仔色的天頂佮椰子樹， 規个畫面媠甲直直留佇頭殼內。這片尾仔有幾偌个少年人圍一个圓箍仔，kā 一粒跤球點火燒起來，遮少年仔踢這粒著火的跤球𨑨迌，那踢那倚著搬電影的布篷（pòo-phâng），火著起來，規頂布篷燒燒了，這陣少年仔徛佇邊仔看火燒。這幕袂輸《風櫃來的人》內底彼幾个少年仔咧看「彩色的大螢幕」。攏是查埔囡仔（gín-á）的青春氣味。
