少年時代目頭懸，看袂起家己的家鄉。啥物攏是外國的上じょうとう，雜誌、冊、電影攏愛看外國的，歌愛聽外國的，光景嘛是外國的較媠。慣勢用這路心理看這个都市，毋才會去帶著（tài-tio̍h）「台北不適應症」這款症頭。
這幾年較骨力雙跤行踏，對上近的草山開始行，平常時佇徛家附近小攑頭就看會著的七星、大屯上捷去，不時爬起哩鴨池看鴨咪仔泅水。徛起哩面天山「微波反射板」邊仔的望高樓看淡水河對岸的觀音山、台北港，看三芝、石門規沿闊曠的海墘。
了後佇市內不時會攑頭金金相、看遠遠只賰兩粒閃爍白點的反射板，袂輸是我家己才知影的秘密，見若眼著，敢若有一个朋友咧頕頭相借問 a̋i-sat-tsuh。有時對外埠頭駛車轉來，七星大屯入目，就感覺安心，咧欲到厝矣。
大概 tiō 是因為骨力行，愈行才愈熟似這个都市，久年的症頭自按呢煞愈來愈少咧夯起來矣。過去坐車對這位去彼位，車窗外看會著的，佮步輾的時看著的，全然無相仝。速度變慢，看會著誠濟干焦眼一下永遠嘛眼袂著的景致。勻勻仔行，連氣味 tō 無仝款。
不管是古早時代城內的三線路，抑是這幾年連少年郎 tō 感覺愈來愈時行的拍鐵仔街、大稻埕，或者是四界凊彩行攏有的巷仔路、駁岸邊，一步一步行。看人塗墼厝、磚仔厝、日本時代宿舍、抑是新點點的樓仔厝的厝面，鼻煮食抑是花草的芳味，聽人講無仝腔口的爸母話、聽粟鳥仔、白頭鵠仔、客鳥仔咧冤家答喙鼓、聽風颺（tshiûnn）過規排菩提樹的葉仔咧唱歌詩。
有一改刁工對西門町爬起哩中興橋，用雙跤行過去三重埔，本來是為著欲看淡水河中央有人咧種菜的「台北島」，後來猶有看著大嵙崁溪佮新店溪按怎敆做夥，成做淡水河。這款新嫣的體驗，就是愛家己步輾才有法度體會著。
舊年（2021年）疫情嚴重的時陣無塊去，不時就旋（suan）去社仔，徛佇島頭公園上頭前的港岸，看基隆河佮淡水河敆流進前，佗一爿的烏仔魚跳較懸，看遠遠黃昏的日頭佮淡水河攏予大海吞落腹。
烏仔魚因為水面下跤空氣無夠，才著拚勢跳出水面，通好欶一口氣。過去幾十年來（或者是成百年來），lán 蹛佇家己的家鄉，定定嘛會感覺無法度喘氣。除了順水流出港，猶有一步較食力的：搢流（tsìnn-lâu）。較綿爛（mî-nuā）對源頭去揣，知影家己啉的水是對佗位流過來，知影 lán 家己細漢大漢蹛的所在，較早號做加蚋仔、號做大浪泵、號做湳仔、號做八芝蘭、號做干豆、號做錫口。知影 lán 本底 tiō 有 lán 家己的名，著愛用 lán 家己的話講出來，著愛用 lán 家己的文字共 lán 家己的故事寫落來。
囡仔時毋捌代誌，台北倯（tâi-pak-sông）倯甲家己 tō 毋知，毋捌家己愛食的果子是生佇塗裡猶是發佇樹仔頂。這幾年目睭擘較會金，較看會清雙跤咧行的路草。照起工一步一步行，規身軀、雙跤雙手、腹內仔、目睭耳空鼻仔攏真正看有 lán 家己的家鄉。
過去「台北不適應症」的症頭差不多就 tiō 是按呢一步一步治好勢矣。
* 這篇文章收佇 2022 年第五版的《在台北生存的一百個理由》